Parlamenti Evropian ka votuar për t’i hequr imunitetin ligjor Grzegorz Braun-it, eurodeputetit polak të ekstremit të djathtë, në mënyrë që ai të përballet me akuza në atdheun e tij për një sërë veprash të pretenduara penale, përfshirë një incident ku ai sulmoi një ceremoni fetare hebraike në parlamentin polak me një bombul zjarri.
Braun, i cili është kandidat në zgjedhjet presidenciale të muajit të ardhshëm në Poloni, vitin e kaluar iu hoq imuniteti nga parlamenti polak dhe u akuzua nga prokuroria. Por më pas ai u zgjodh në Parlamentin Evropian, çka i dha atij sërish imunitet.
Prokurori i përgjithshëm i Polonisë, Adam Bodnar, i cili është gjithashtu ministër i drejtësisë, kishte kërkuar nga Parlamenti Evropian të hiqte imunitetin e Braun-it në lidhje me shtatë incidente të ndara që ndodhën gjatë viteve 2022 dhe 2023.
“Mandati parlamentar mund ta vonojë momentin e përgjegjësisë për veprimet e dikujt, por nuk do të thotë paprekshmëri,” shkroi Bodnar në platformën X përpara votimit.
Incidenti më i përfolur dhe i raportuar gjerësisht ndodhi në dhjetor 2023, kur Braun përdori një bombul zjarri për të fikur qirinjtë e Hanukës që ishin ndezur gjatë një ceremonie në parlamentin polak ku merrnin pjesë udhëheqës hebrenj-polakë.
Braun, i cili ka një histori të gjatë të sulmeve ndaj grupeve minoritare dhe të përhapjes së teorive konspirative, më pas doli në podiumin parlamentar për të deklaruar se po “rikthente një gjendje normaliteti duke i dhënë fund akteve të triumfalizmit satanik e racist, sepse ky është mesazhi i këtyre [festave të Hanukës]”.
Kryetari i parlamentit e përjashtoi Braun-in nga seanca, i vendosi gjobën më të lartë të mundshme dhe raportoi veprimet e tij tek prokuroria, e cila më pas e akuzoi për fyerje të një grupi fetar – një vepër penale në Poloni që mund të çojë në burg.
Një tjetër incident për të cilin Braun është akuzuar ka të bëjë me dëmtimin e pronës kur ai ndërpreu një ligjëratë të një studiuesi hebreo-polak të Holokaustit në Institutin Historik Gjerman në Varshavë.
Ai gjithashtu akuzohet për fyerje dhe cënim të integritetit trupor të drejtorit të Institutit Kombëtar të Kardiologjisë dhe për dëmtimin e një peme Krishtlindjeje që e hoqi nga një gjykatë për shkak se ishte dekoruar me flamuj të BE-së dhe LGBT+.
Pas votimit të sotëm për t’i hequr imunitetin, Braun publikoi një video ku digjte flamurin e Bashkimit Evropian dhe shkroi: “Poshtë euro-komunizmi! Kjo është Polonia.”
Gjatë fushatës presidenciale që është në zhvillim, Braun ka vazhduar të shkaktojë polemika. Prokuroria po e heton aktualisht për deklarata antisemite të bëra gjatë një debati televiziv javën e kaluar lidhur me të ashtuquajturën “judaizim” të Polonisë.
Ai gjithashtu po hetohet për incidente të tjera, ku ka nxitur heqjen e një flamuri ukrainas jashtë një bashkie polake dhe për vandalizimin e një ekspozite për personat LGBT+ në një shesh qyteti në Poloni.
Braun është një kandidat i rangut të ulët në garën presidenciale, me sondazhet që i japin atij mes 1% dhe 3% mbështetje gjatë gjithë fushatës. Simboli kryesor i fushatës së tij ka qenë një bombul zjarri, në referencë ndaj sulmit ndaj festës së Hanukës në parlament.
Precz z eurokomuną! Tu jest Polska 🇵🇱 pic.twitter.com/e0PLoXlZJA
— Grzegorz Braun (@GrzegorzBraun_) May 6, 2025
