Prizren, 8 maj 2025 — Kryeministri në detyrë i Republikës së Kosovës, Albin Kurti, së bashku me zëvendëskryeministren në detyrë, Emilia Rexhepi, dhe deputetë të zgjedhur të Kuvendit, kanë bërë sot homazhe në varrezat e dëshmorëve në Landovicë, për të nderuar jetën dhe veprën e heroit Ekrem Rexha – i njohur si “Komandant Drini”.
Homazhet u bënë në kuadër të përvjetorit të 25-të të rënies së Komandant Drinit, një figurë kyçe në luftën çlirimtare të Ushtrisë Çlirimtare të Kosovës.
“Ekrem Rexha, ‘Komandant Drini’, ka qenë një veprimtar intelektual, një luftëtar i paepur i cili me pushkë në dorë e strategji në mendje u përball me armikun e okupatorin serb”, deklaroi Kurti pas homazheve. Ai shtoi se vizita dhe nderimi pranë varrit të tij është një shprehje mirënjohjeje të thellë për kontributin jetësor të Komandant Drinit dhe sakrificën e familjes së tij.
Kurti tha se kjo ditë është një kujtesë e përhershme për luftën e drejtë dhe për ata që dhanë jetën për lirinë e Kosovës. Ai nënvizoi rëndësinë e ruajtjes së kujtesës historike dhe të trashëgimisë së luftës për brezat që vijnë.
Homazhet në Landovicë u zhvilluan në një atmosferë solemne dhe të respektit të thellë, ku morën pjesë edhe qytetarë, veteranë të luftës dhe familjarë të dëshmorëve.
