Përderisa në Kremlin po mbahet paradë në shënim të Ditës së Fitores, ministrat e jashtëm të BE-së kanë premtuar mbështetje të mëtejshme për Ukrainën ndërsa kanë miratuar gjykatën për liderët rusë.
Gjatë një takimi në Lviv, Ukrainë, përfaqësuesit e vendeve të BE-së, vendeve kandidate dhe Britanisë kanë dërguar një sinjal të qartë solidariteti mes pushtimit të vazhdueshëm rus.
“Ne po festojmë së bashku Ditën e Evropës, ndërsa një paradë po zhvillohet në Kremlin. Dhe Putin – ai mund ta konsiderojë veten të ashtuquajturin fitues, por nuk ka të drejtë të monopolizojë fitoren”, ka thënë fillimisht ministri i jashtëm i Ukrainës Andrii Sybiha.
Ndërkohë, sipas AFP-së, BE-ja është zotuar të shpërndajë një miliard euro nga të ardhurat e aseteve të ngrira ruse për kompanitë ukrainase të armëve, si pjesë e mbështetjes së saj për Kievin.
Nga ana tjetër aleatët poashtu kanë miratuar krijimin e një gjykate për gjykim të liderëve rus, për krimin dhe agresionin kundër Ukrainës.
“Ne mirëpresim përfundimin e punës teknike mbi projekt-instrumentet ligjore të nevojshme për të krijuar brenda kornizës së Këshillit të Evropës një Tribunal Special për Krimin e Agresionin kundër Ukrainës”, është thënë në një deklaratë të përbashkët të publikuar nga ministria e jashtme e Ukrainës
