Skenderaj – Klubi i futbollit “Drenica” ka siguruar rikthimin e shumëpritur në elitën e futbollit kosovar, duke u shpallur kampion i Grupit A në Ligën e Parë. “Kuqezinjtë” e Skenderajt siguruan fitoren vendimtare ndaj Istogut me rezultat 3-1, falë një hettriku spektakolar nga sulmuesi Igball Jashari.
Ndeshja, e zhvilluar në atmosferë festive, konfirmoi formën e lartë të ekipit gjatë këtij sezoni dhe përmbushi misionin e kthimit në Superligë pas disa viteve mungesë.
Me këtë fitore, Drenica mbyll sezonin me 55 pikë, duke zënë vendin e parë në Grupin A dhe duke siguruar automatikisht promovimin në Superligën e Kosovës në futboll.
Ky sukses është rezultat i përkushtimit të klubit, stafit dhe lojtarëve, dhe shënon një kthesë të rëndësishme për një nga klubet më të njohura dhe me histori të pasur në futbollin kosovar.
Tifozët “kuqezi” tashmë presin me padurim rikthimin në arenën më të lartë të garave kombëtare, ku Drenica synon të jetë faktor serioz dhe konkurrent i denjë.
