Inter ka shtuar gjasat për të fituar dy trofetë më të rëndësishëm të sezonit – “Scudetto” dhe Champions League falë kontributit nga lojtarët që deri më tani kishin pasur më pak minuta në fushë.
Pas një fitore epike kundër Barcelonës në Evropë, trajneri Simone Inzaghi ka vendosur ta freskojë ekipin duke bërë shumë ndryshime në formacion, një qasje që është treguar frytdhënëse me dy fitore radhazi në Serie A. E fundit kundër Torino (2:0), që njëkohësisht ka shënuar edhe fitoren njëqindtë të Inzaghi në kampionat si trajner i Inter.
Golat e Nicola Zalewski dhe Kristjan Asllanit kanë qenë vendimtarë në këtë triumf, ndërsa Napoli, lider i tabelës, është ndalur me barazim 1:1 në shtëpi kundër Genoa, duke bërë që diferenca të ngushtohet në vetëm një pikë.
Zalewski, i huazuar nga Roma në shkurt, ka realizuar një gol të bukur me një lëvizje teknike dhe goditje të saktë, duke shfrytëzuar rastin në mungesë të Lautaro Martinez dhe Marcus Thuram. Ndërkohë, Asllani ka treguar sërish qetësi dhe saktësi nga pika e bardhë, duke shënuar për herë të dytë radhazi pas penalltisë kundër Verona.
Mehdi Taremi e ka fituar penalltinë, në paraqitjen e tij të parë si titullar që nga shkurti, ndërsa mungesa e Frattesi për shkak të një lëndimi ka vështirësuar alternativat për Inzaghin. Sidoqoftë, mesfushori italian mbetet një armë e rëndësishme për finalen e Champions League më 31 maj kundër PSG-së.
Në portë, Josep Martinez e ka zëvendësuar Yann Sommer dhe ka treguar siguri, duke mos pësuar gol dhe duke bërë një pritje vendimtare para pushimit.
Inter i kanë mbetur edhe dy ndeshje në kampionat dhe përballja me Lazio këtë fundjavë mund të zhvillohet pa disa prej titullarëve për shkak të lëndimeve. Megjithatë, Inzaghi pritet të vazhdojë t’i besojë thellësisë së skuadrës, ndërsa ndjek objektivin për një sezon historik
