Përgatiti: Redaksia
Në një kohë kur Tirana është kthyer në epiqendrën e zhvillimeve më të rëndësishme evropiane dhe transatlantike, me 47 liderë të lartë nga mbarë Evropa të mbledhur për të diskutuar të ardhmen e kontinentit, kreu i Lidhjes Demokratike të Kosovës, Lumir Abdixhiku, ka lëshuar një reagim të fortë kundrejt Kryeministrit në detyrë, Albin Kurti.
Në reagimin e tij, Abdixhiku e cilëson deklaratën e Kurtit – se “nuk ka urgjencë për krijimin e institucioneve” – si të papërgjegjshme dhe të shkëputur nga realiteti gjeopolitik që po formësohet pikërisht tani.
“Evropa sot po zbarkon në Tiranë. E gjitha. Me plot 47 liderët e saj,” thekson Abdixhiku, duke vënë në pah simbolikën dhe rëndësinë që ky takim ka për të ardhmen e Ballkanit dhe integrimin e tij në strukturat evropiane.
Ndërsa në Tiranë shihen hapa të qartë drejt afrimit të rajonit me BE-në, Kosova – sipas Abdixhikut – ndodhet nën masa ndëshkuese nga të njëjtat vende që janë mbledhur për të ndarë vizionin e përbashkët evropian. Dhe më keq akoma, është pa institucione funksionale.
“Vazhdon të mbetet pa ndjenjën e urgjencës për kohën,” shkruan Abdixhiku, duke i mëshuar idesë se udhëheqja aktuale po i shkon për shtat vakumit institucional, duke përfituar nga stanjacioni për qëllime të brendshme politike. Ai e cilëson këtë si një qasje ku “shijimi i jetës së pushtetit është vetë qëllimi”, ndërsa zhvillimi dhe progresi shoqëror janë lënë në harresë.
Kjo, sipas tij, e ka izoluar Kosovën nga proceset e mëdha integruese dhe i ka mbyllur dyert në një kohë kur rajoni po përgatitet për një epokë të re evropiane.
Kreu i LDK-së bën thirrje për një “rizgjim kombëtar”, i cili nuk mund të shtyhet më tej. “Sot, ky rizgjim Kosove, kërkon urgjencë,” thekson ai. Urgjencë që, sipas tij, nuk do të vijë nga ata që janë të rehatuar në pushtet, por nga vetë qytetarët e Kosovës.
Duke përgëzuar Shqipërinë për rolin e saj dhe për organizimin e takimit të rëndësishëm në Tiranë, Abdixhiku paralajmëron se Kosova do të mbetet në prapavijë nëse nuk ndodh një kthesë e shpejtë dhe vendimtare në skenën politike dhe institucionale.
