Një udhëheqës i lartë politik në Hamas ka përsëritur se ata janë të gatshëm të “dorëzojnë të gjithë të burgosurit menjëherë” nëse një veprim i tillë do t’i jepte fund luftës në vazhdim.
Basem Naim tha se mendon që Presidenti i SHBA-së Donald Trump “mund ta bëjë këtë nëse ushtron presion të mjaftueshëm mbi izraelitët për ta përfunduar këtë luftë menjëherë”, duke shtuar se Trump “ka aftësinë dhe vullnetin për të arritur këtë situatë paqësore”.
“Ne jemi të gatshëm të bashkëpunojmë me të për të arritur këtë qëllim të një rajoni më paqësor”, tha ai për Sky News.
Ai theksoi se Gaza dhe banorët e Gazës meritojnë, si të gjithë njerëzit e tjerë kudo, të jetojnë në paqe dhe dinjitet.
“E kemi thënë për të gjithë ndërmjetësit dhe për amerikanët, ne jemi të gatshëm t’i dorëzojmë të gjithë të burgosurit menjëherë, nëse mund të jemi të sigurt se kjo do të çojë në fund të kësaj lufte”, tha Naim në përgjigje të një pyetjeje nëse ata janë të gatshëm të dorëzojnë pengjet.
Ai vuri në dukje se ata përcollën përmes ndërmjetësve dhe drejtpërdrejt përmes “disa personave në administratat amerikane”, se po bëjnë thirrje për tërheqje të plotë të forcave izraelite, duke lejuar që ndihma të hyjë në Gaza dhe rindërtimin e rripit pa migrim të detyruar.
Ai tha se Hamasi ka pranuar një propozim paqeje të Egjiptit, i cili ka të bëjë me “formimin e një organi palestinez, të pavarur dhe të palidhur politikisht për të drejtuar Rripin e Gazës”.
Por ai shtoi: “Para kësaj, për sa kohë që jemi ende popull i pushtuar, kemi të drejtë të vazhdojmë të mbrojmë popullin tonë dhe t’i rezistojmë pushtimit me të gjitha mjetet, përfshirë edhe rezistencën”.
Në përgjigje të intervistës, zëdhënësi i Këshillit të Sigurisë Kombëtare të Shtëpisë së Bardhë, James Hewitt, tha se Hamasi “nuk ka treguar se është serioz për paqen”.
Hewitt tha se Trump “ka qenë i qartë se Hamasi duhet të lëshojë armët”.
Ushtria izraelite ka ndjekur një ofensivë brutale në Rripin e Gazës që nga 7 tetori 2023, duke vrarë deri më tani më shumë se 53,000 palestinezë, shumica prej tyre gra dhe fëmijë.
Gjykata Ndërkombëtare Penale lëshoi urdhër-arreste nëntorin e kaluar për kryeministrin izraelit Benjamin Netanyahu dhe ish-ministrin e tij të Mbrojtjes, Yoav Gallant, për krime lufte dhe krime kundër njerëzimit në Gaza.
Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën e tij në enklavë.
