Barcelona mund të rikthehet në garë për të transferuar objektivin e vjetër dhe yllin e Manchester United, Marcus Rashford, gjatë kësaj vere.
Rashford ka shkëlqyer gjatë huazimit gjashtëmujor te Aston Villa, ndërsa skuadra e Unai Emeryt vazhdon betejën për një vend në Ligën e Kampionëve. Emery ka deklaruar se do të presë deri në fund të sezonit për të vendosur nëse do ta mbajë sulmuesin anglez.
Megjithatë, si Villa ashtu edhe Barcelona janë të pasigurta nëse do të bëjnë një lëvizje konkrete, pasi 27-vjeçari po i afrohet një momenti vendimtar në karrierën e tij këtë verë.
Sipas raportimeve nga “Daily Mail”, Manchester United ka bërë të ditur se nuk ekziston asnjë marrëveshje që i jep përparësi Aston Villas për ta blerë Rashfordin, dhe çmimi i kërkuar për të është 40 milionë paund. Ky çmim është i njëjtë me opsionin që ka Villa për ta blerë, por nuk është ekskluziv, që do të thotë se edhe klubet e tjera mund të hyjnë në garë.
Rashford është nën kontratë me Manchester United deri në vitin 2028 dhe pritet të rikthehet në stërvitje para-sezonale në qershor, me të ardhmen e tij ende të paqartë.
Barcelona e ka ruajtur interesimin për Rashfordin, por çdo lëvizje do të varet nga përballueshmëria financiare. Katalanasit do të synojnë ta ulin çmimin dhe të negociojnë një marrëveshje që përfshin edhe zgjidhjen e kontratës së tij me United.
Aston Villa aktualisht mbulon rreth 75% të pagës së tij si pjesë e marrëveshjes së huazimit, ndërsa pjesa tjetër paguhet nga United. Nëse Rashford arrin marrëveshje me ndonjë ekip tjetër, kjo me shumë gjasë do të përfshijë një ulje page, pasi paga e tij aktuale është rreth 315 mijë paund në javë
Manchester United mund të detyrohet të paguajë miliona paund në formë dëmshpërblimi në rast ndarjeje, ndërsa Barcelona dhe Villa përpiqen ta shfrytëzojnë situatën për të arritur një marrëveshje me një çmim të ulët. “La Blaugrana” është e vendosur të mos shkelë rregullat financiare të La Ligës sërish në vitin 2025.
