Në një përballje dramatike të javës së 37-të në Ligën Premier, Brighton arriti një fitore të madhe ndaj kampionit të shpallur Liverpool, me rezultat 3-2, në stadiumin “Amex”.
Liverpooli kaloi shpejt në epërsi në minutën e 9-të me golin e Harvey Elliott, pas një asisti preciz nga Conor Bradley për 1-0.
Megjithatë, vendasit reaguan në minutën e 32-të me golin e Yasin Ayavit për 1-1, i asistuar nga Brajan Gruda.
Në fund të pjesës së parë, të kuqtë rimorën epërsinë. Dominik Szoboszlai realizoi për 2-1 në kohën shtesë pas një aksioni të ndërtuar nga Elliott.
Pjesa e dytë i takoi më shumë Brightonit, që e shtoi presionin dhe arriti të barazojë shifrat në minutën e 69-të përmes Kaoru Mitomas.
Shtatë minuta para fundit, Jack Hinshelwood realizoi golin e fitores për Brighton, duke përmbysur rezultatin në 3-2.
Pavarësisht humbjes, Liverpooli, tashmë i shpallur kampion, qëndron në krye me 83 pikë. Ndërkohë, Brighton ngjitet në vendin e tetë me 58 pikë, duke ruajtur gjallë shpresat për garat evropiane.
