Një ngjarje e rëndë ka ndodhur më 19 maj 2025 në lagjen Matiqan të Prishtinës, ku një foshnjë e porsalindur është gjetur e braktisur brenda një qeseje plastike në një deponi mbeturinash.
Policia e Kosovës ka dalë me një njoftim zyrtar lidhur me rastin.
Sipas policisë, një qytetar kishte njoftuar autoritetet pasi kishte hasur në foshnjën e braktisur. Në vendin e ngjarjes kanë arritur njësitet policore dhe ekipi mjekësor, i cili ka konstatuar se foshnja kishte ndërruar jetë.
Njoftimi i Policisë:
“Prishtinë – Më 19.05.2025. Dëshmitari mashkull kosovar ka njoftuar se kishte gjetur një foshnje të braktisur. Në vendngjarje kanë dalë njësitet përkatëse policore dhe ekipi i emergjencës, ku mjeku ka konstatuar vdekjen. Me vendim të prokurorit trupi i pajetë është dërguar në IML për obduksion. Rasti është duke u hetuar nga njësitet relevante.”
Rasti ka ngjallur reagime të shumta në opinionin publik, ndërsa hetimet janë në zhvillim për të identifikuar personin apo personat përgjegjës për këtë akt të rëndë.
