Trajneri i Tottenham Hotspur, Ange Postecoglou, ka thënë se ka punuar pa pushim për ta rikthyer Tottenham në rrugën e suksesit, duke e konsideruar një sfidë të madhe me shumë pengesa.
Tottenham përballet me Manchester United të mërkurën në Bilbao, në finalen e madhe të Europa League, ku do të kërkojë të fitojë trofeun e parë që nga viti 2008 dhe të sigurojë një vend në Champions League për sezonin e ardhshëm.
Postecoglou ka folur para finales duke theksuar rëndësinë e këtij momenti për klubin.
“Kam bërë gjithçka që kam mundur për ta kthyer klubin në një pozitë ku mund të luftojë për trofe dhe njëkohësisht të rinovoj skuadrën dhe të ndryshoj mënyrën e lojës”, ka thënë ai.
“Nesër kemi një mundësi reale për të përmbushur detyrën që më është dhënë: të sjell një trofe te Tottenham”.
Skuadra e Postecoglou aktualisht renditet në vendin e shtatëmbëdhjetë në Premier League, një pozitë më poshtë se United, dhe trajneri australian është përballur me presion të madh gjatë muajve të fundit pas rënies së ndjeshme në formë.
Trajneri pesëdhjetë e nëntë vjeçar është shprehur se nuk ka diskutuar për të ardhmen e tij me lojtarët, duke theksuar se fokusi është vetëm te ndeshja.
“U kam thënë djemve që nga dita e parë: asgjë nuk është e garantuar në jetë, as në sport. Thjesht duhet të përfitosh nga çdo mundësi që të jepet, dhe këtë e kam bërë gjithë karrierën time”, ka thënë ai
Australiani e ka pranuar se ka qenë më parë në situata kur një ndeshje e madhe ka qenë e fundit për të si trajner, por nuk e shqetëson kjo. Përkundrazi, ai ndjen se po ndërton një bazë të fortë për të ardhmen e klubit.
“Mendoj se jemi duke ndërtuar diçka të fortë, dhe një trofe mund ta përshpejtojë këtë proces. Ka ende shumë punë për të bërë, por kemi pasur edhe rritje që dua ta çoj deri në fund”, ka thënë tekniku i “Spurs”.
Në prag të finales, Postecoglou e ka konfirmuar se Lucas Bergvall nuk do të jetë i gatshëm për ndeshjen ndaj Manchester United. Jashtë formacionit do të jenë gjithashtu James Maddison dhe Dejan Kulusevski.
Megjithatë, një lajm pozitiv është rikthimi i Pape Matar Sarr, i cili do të jetë në dispozicion pas lëndimit që e ka pësuar në humbjen 2-0 ndaj Aston Villa fundjavën e kaluar.
