Drejtori i Policisë së Kosovës, Gazmend Hoxha, ka pritur në takim të Ngarkuarën me Punë në Ambasadën e SHBA-së në Kosovë, znj. Anu Prattipati, me të cilën ka diskutuar për çështje të sigurisë dhe bashkëpunimit ndërinstitucional.
Takimi është zhvilluar në ambientet e Drejtorisë së Përgjithshme të Policisë së Kosovës, ku, sipas njoftimit zyrtar, u trajtuan tema të rëndësishme që lidhen me situatën e sigurisë së përgjithshme në vend, si dhe çështje me interes për zhvillimin e mëtutjeshëm të organizatës policore.
Drejtori Hoxha theksoi se Policia e Kosovës, si një institucion profesional dhe i përkushtuar, po realizon me sukses objektivat e saj strategjike, duke kontribuar në ruajtjen e rendit kushtetues dhe në shërbim të qytetarëve në nivel vendi.
Palët theksuan rëndësinë e bashkëpunimit dhe koordinimit të vazhdueshëm, me qëllim të garantimit të rendit dhe sigurisë publike, si dhe nevojën për ruajtjen e besimit të qytetarëve në institucionet e sigurisë.
Drejtori Hoxha shprehu gatishmërinë për thellimin e mëtejshëm të bashkëpunimit në fushat me interes të përbashkët ndërmjet Policisë së Kosovës dhe Ambasadës së Shteteve të Bashkuara.
