Ministri në detyrë i Punëve të Brendshme të Kosovës, Xhelal Sveçla, ka pritur në një takim zyrtar të ngarkuarën me punë në Ambasadën e Shteteve të Bashkuara të Amerikës në Kosovë, Anu Prattipati.
Lajmin e ka bërë të ditur vetë ministri Sveçla përmes një postimi në rrjetin social Facebook, ku ka njoftuar se gjatë takimit është diskutuar për një sërë temash me rëndësi, përfshirë angazhimet e Ministrisë së Punëve të Brendshme si dhe situatën aktuale në vend.
“Diskutuam mbi angazhimet e Ministrisë së Punëve të Brendshme dhe situatën aktuale në vend. Shpreha përkushtimin tim për bashkëpunim të vazhdueshëm të bazuar në interesat më të mira për të dyja shtetet tona,” – ka shkruar Sveçla.
Takimi vjen në një kohë kur në vend po trajtohen zhvillime të ndjeshme në fushën e sigurisë dhe bashkëpunimit ndërkombëtar, veçanërisht në raport me partnerët strategjikë si Shtetet e Bashkuara të Amerikës.
Ministri Sveçla dhe përfaqësuesja amerikane theksuan rëndësinë e bashkëpunimit të ngushtë institucional, si dhe përkushtimin e ndërsjellë për forcimin e rendit, sigurisë dhe sundimit të ligjit në Kosovë.
Kjo vizitë konfirmon edhe njëherë rolin aktiv të SHBA-së në proceset demokratike dhe të sigurisë në vend, si dhe mbështetjen e vazhdueshme për institucionet kosovare në përballjen me sfidat aktuale.
