Dylli i veshit është një substancë natyrale që prodhohet nga trupi për të mbrojtur dhe pastruar kanalin e veshit. Ai vepron si një barrierë ndaj pluhurit, grimcave të dëmshme dhe mikroorganizmave që mund të shkaktojnë infeksione.
Në shumicën e rasteve, dylli del vetë nga veshi pasi përthahet. Megjithatë, tek disa persona prodhohet në sasi të tepërt, duke shkaktuar bllokim të kanalit të dëgjimit dhe simptoma shqetësuese si:
Dhimbje veshi
Zhurmë apo fishkëllimë
Kruarje
Infeksion
Rrjedhje sekrecionesh
Aromë të pakëndshme
Çfarë nuk duhet të bëni?
Përdorimi i objekteve si kunjat e pambukut apo karficat për pastrimin e veshit është një praktikë e gabuar. Këto mjete shpesh e shtyjnë dyllin edhe më thellë, duke rritur rrezikun për inflamacion dhe bllokim.
Personat që përdorin shpesh kufje kanë më shumë gjasa të përballen me këtë problem.
Metodat natyrale për pastrimin e veshit
Uthull molle dhe alkool
Përzieni 2 lugë gjelle uthull molle me 2 lugë alkool etilik. Hidhni disa pika në vesh me pikatore, vendosni pambuk dhe prisni disa minuta. Më pas ktheni kokën që lëngu të rrjedhë jashtë. Përsëriteni procedurën sipas nevojës.
Vaji i arrës së kokosit
Ngrohni pak vaj kokosi derisa të lëngëzohet (pa e bërë të nxehtë). Hidhni disa pika në vesh, mbajeni kokën të anuar për 10 minuta dhe më pas ktheni anën për të ndihmuar rrjedhjen. Shpëlani me ujë të ngrohtë dhe thajeni me peshqir.
Glicerina
Përzieni disa pika glicerinë me pak ujë. Aplikojeni në vesh dhe lëreni të veprojë për 5 minuta. Më pas, hidhni 2-3 pika alkool etilik për të përshpejtuar tharjen dhe pastrimin.
Vaji i hudhrës
Shtypni 2-3 thelpinj hudhre dhe skuqini lehtë me vaj susami. Pas ftohjes, kullojeni vajin dhe hidhni disa pika në secilin vesh. Lëreni të veprojë për disa minuta përpara se të ktheni kokën për ta nxjerrë jashtë.
Kujdes!
Mos përdorni asnjë lloj vaji apo tretësire nëse keni infeksione aktive, çarje të daulles së veshit apo simptoma të forta pa u këshilluar më parë me mjekun.
