Një video virale që tregon atë që duket si një shuplakë nga zonja e parë franceze, Brigitte Macron, ndaj bashkëshortit të saj, Presidentit Emmanuel Macron, pas mbërritjes së tyre në Vietnam, ka shkaktuar një valë talljesh nga diplomacia ruse, duke e kthyer incidentin në një tjetër pikë përplasjeje mes dy shteteve.
Zëdhënësja e Ministrisë së Jashtme ruse, Maria Zakharova, shfrytëzoi rastin për të ironizuar Pallatin Elysee dhe justifikimet e mundshme për ngjarjen. “Ajo që është interesante nuk është videoja, por ajo që do të thojë këtë herë Pallati Elysee për të mbuluar këtë skandal të ri Emmanuel,” tha Zakharova, duke shtuar me sarkazëm: “Çfarë do të jetë këtë herë? Zonja e Parë donte ta gëzonte burrin e saj duke e përkëdhelur butësisht në faqe, por ajo e llogariti gabim forcën e saj? Ajo i dha një shami, por ai nuk e arriti?” Kulmi i ironisë erdhi kur Zakharova sugjeroi në Telegram: “Sugjerimi im: ndoshta ishte dora e Kremlinit.”
Videoja, e filmuar në aeroportin e Hanoit, tregon derën e avionit presidencial francez duke u hapur, me Presidentin Macron ende brenda. Në atë moment, duart e Brigitte Macron janë të dukshme, duke u ngritur shpejt drejt fytyrës së presidentit, një veprim që mediat botërore e kanë interpretuar gjerësisht si një shuplakë.
Ndërkohë, Presidenti Macron u përpoq sot të qetësonte situatën, duke hedhur poshtë thashethemet për një “grindje familjare” me bashkëshorten e tij. Ai deklaroi se çifti thjesht “bënte shaka” me njëri-tjetrin dhe u kërkoi “të gjithëve të relaksoheshin” në lidhje me interpretimet e këtyre imazheve.
Megjithatë, në Rusi, videoja e momentit kontrovers është transmetuar disa herë në rrjetet televizive shtetërore të lajmeve, duke treguar qartë dëshirën e Moskës për të theksuar çdo mundësi për të minuar imazhin e liderit francez dhe, në një kuptim më të gjerë, të diplomacisë perëndimore. Ky incident, sado i parëndësishëm në thelb, shërben si një shembull i qartë i luftës informative dhe propagandistike që zhvillohet mes Rusisë dhe Perëndimit, ku edhe detajet më të vogla shfrytëzohen për avantazh politik.
