Nga redaksia
Kryeministri në detyrë, Albin Kurti, ka konfirmuar se Lëvizja Vetëvendosje (LVV) do të vazhdojë të propozojë Albulena Haxhiun për kryetare të Kuvendit deri në zgjedhjen e saj, duke fajësuar partitë e tjera politike për zvarritjet dhe bllokadën aktuale. Sipas Kurtit, zgjidhja e ngërçit qëndron te votimi i fshehtë.
“Albulena Haxhiu nuk është as në pyetje, as në pikëpyetje. Dhe përgjigjja është votimi i fshehtë, për çfarë opozita padrejtësisht dhe me dëm për shtetin e Kosovës po e pamundëson kuorumin,” theksoi Kurti.
Ndërkohë, përderisa sot shënohet përpjekja e 22-të e LVV-së për konstituimin e Kuvendit, deputeti i LVV-së, Artan Abrashi, ka konfirmuar se partia e tij ka kontaktuar deputetë të partive të tjera, duke e cilësuar këtë si një të drejtë legjitime. “LVV-ja po bën përpjekje të vazhdueshme për ta konstituar Kuvendin. Deputetët nuk janë pronë e askujt dhe është e drejtë demokratike që të kontaktohen,” deklaroi Abrashi për RTV21.
Këto përpjekje të LVV-së për të krijuar një shumicë parlamentare të vetme dhe “joshur” deputetë janë denoncuar nga opozita. Deputetja Duda Bale dhe më pas AAK, si dhe LDK, akuzuan LVV-në se nga njëra anë fton për koalicion, ndërsa nga ana tjetër tenton t’ua “marrë deputetët me transaksione të ndryshme”. PDK-ja, ndërkohë, as nuk e ka mohuar e as pohuar kontaktet me deputetët e saj.
Anëtari i kryesisë së PDK-së, Naim Ismajli, theksoi se partia e tij vazhdon të jetë kundër votimit të fshehtë dhe kundër zgjedhjes së Albulena Haxhiut si kryetare e Kuvendit. Megjithatë, Abrashi nuk mohoi kontaktet me deputetë të PDK-së dhe foli edhe për mundësinë e një koalicioni LVV-PDK, duke shtuar: “Ne kemi një hendek të madh me PDK-në. Preferojmë një koalicion me LDK-në. Mendimi im është që PDK duhet të reflektojë dhe ia lëmë kohës….”
Njohësi i rrethanave politike, Shemsi Jashari, thekson se fajtori kryesor për zvarritjen e formimit të institucioneve është kryeministri në detyrë, Albin Kurti. Megjithatë, sipas tij, vonesat dhe ngërçi i krijuar mund të kenë edhe një qëllim tjetër të fshehtë. “Se si do të përfundojë kjo situatë aq e pakëndshme është e paqartë, meqenëse secili opsion është i mundshëm të bëhet në mënyrë që të arsyetohet një koalicion i befasishëm për qytetarët,” deklaroi Jashari për RTV21.
Edhe kryetari i Nismës, Fatmir Limaj, ka folur ditë më parë për një marrëveshje politike me LVV-në, pa dhënë shumë detaje. Deri më tani, zyra e Presidentes Osmani nuk ka dhënë asnjë përgjigje lidhur me rolin e saj në zhbllokimin e situatës.
Me 21 dështime të shkuara pas krahëve, a do të shënojë dita e 22-të një kthesë, apo do të vazhdojë odiseja politike e Kosovës?
