Trupat e Forcës Tokësore shqiptare janë nisur në orët e para të mëngjesit të sotëm nga garnizoni i Zall-Herrit drejt Qendrës së Stërvitjes në Bizë, duke shënuar kështu fillimin zyrtar të stërvitjes së përbashkët ndërkombëtare “Defender Europe ‘25”. Kjo stërvitje konsiderohet si një ndër më të mëdhatë dhe më komplekset e dekadës së fundit në Evropë dhe Afrikë.
“Defender Europe ‘25” zhvillohet nën udhëheqjen e Komandës Evropiane të SHBA (EUCOM), në bashkëpunim të ngushtë me vendet aleate dhe partnere të NATO-s. Si një nga vendet pritëse kryesore, Shqipëria luan një rol strategjik thelbësor në garantimin e suksesit të operacioneve dhe zhvillimeve të planifikuara.
Kjo stërvitje gjigande synon disa objektiva kyç:
Rritjen e ndërveprimit mes forcave të armatosura aleate.
Forcimin e gatishmërisë ushtarake.
Aftësinë për të reaguar shpejt ndaj çdo kërcënimi të mundshëm në hapësirën euroatlantike.
Ministria e Mbrojtjes dhe Forcat e Armatosura të Republikës së Shqipërisë janë shprehur të angazhuara plotësisht për të siguruar një mjedis operacional të suksesshëm dhe për të kontribuar në mbrojtjen kolektive, stabilitetin rajonal dhe paqen ndërkombëtare.
Ministri i Mbrojtjes, Pirro Vengu, ndau pamje nga translokimi i trupave në Zall-Herr në rrjetet sociale sot. “Nga Zall-Herri ku në orët e para të mëngjesit, trupat e Forcës Tokësore janë nisur drejt Qendrës së Stërvitjes në Bizë, për të filluar zyrtarisht Defender Europe 25 – një nga stërvitjet më të mëdha dhe më komplekse të dekadës së fundit në Evropë dhe Afrikë,” shkroi Vengu.
“Defender Europe ‘25” dëshmon angazhimin e Shqipërisë dhe aleatëve të saj ndaj sigurisë kolektive dhe gatishmërisë për të përballuar sfidat e ardhshme.
