Gjermania dhe Ukraina synojnë të zhvillojnë së bashku prodhimin industrial të raketave me rreze të gjatë veprimi, tha të mërkurën kancelari gjerman Friedrich Merz teksa u zotua të vazhdojë të ushtrojë më shumë presion mbi Rusinë për pushtimin e saj në Ukrainë.
Duke folur gjatë një vizite të presidentit ukrainas Volodymyr Zelenskiy në Berlin, Merz tha se qeveria e tij nuk do të vendosë asnjë kufizim të rrezes së raketave që mund të prodhohen në Ukrainë dhe Gjermani.
“Ne duam të mundësojmë armë me rreze të gjatë, duam gjithashtu të mundësojmë prodhimin e përbashkët dhe nuk do të flasim për detaje publikisht, por do të intensifikojmë bashkëpunimin”, tha ai në një konferencë të përbashkët shtypi me Zelenskiy.
Zelenskiy tha se të dy liderët kishin rënë dakord të bashkëpunonin në prodhimin në Ukrainë të armëve, përfshirë dronët. Zyrtarët qeveritarë kishin nënshkruar marrëveshje për ndërtimin dhe zhvillimin e objekteve prodhuese, tha ai.
“Këto projekte të reja tashmë ekzistojnë,” tha ai. “Ne duam që ato të jenë në sasinë që ne kemi nevojë.”
Vizita e Zelenskiy në Gjermani vjen pasi zyrtarët ukrainas dhe rusë u takuan këtë muaj për negociata ballë për ballë, nën presionin e Presidentit të SHBA Donald Trump për t’i dhënë fund luftës.
Megjithatë, bisedimet dështuan në arritjen e një marrëveshjeje armëpushimi dhe Rusia nisi tre net sulme masive ajrore ruse në Ukrainë gjatë fundjavës. Moska gjithashtu ka mbledhur 50,000 trupa pranë rajonit Sumy verior të Ukrainës, u tha Zelenskiy gazetarëve.
Lëvizjet ushtarake nuk “flasin gjuhën e paqes”, tha Merz.
“Kjo është një shuplakë për të gjithë ata që po luftojnë për një armëpushim, në vetë Ukrainën, por edhe në Evropë dhe SHBA. tha ai.
Rusia ka akuzuar Ukrainën për rritje të konsiderueshme të sulmeve me dronë dhe raketa në territorin rus gjatë javës së kaluar duke përdorur municione të furnizuara nga perëndimi.
