Një ngjarje e rëndë është regjistruar mëngjesin e sotëm në Prishtinë, ku një person është gjetur pa shenja jete pranë fontanës në lagjen Ulpiana.
Lajmin e ka konfirmuar zëdhënësja e Policisë për rajonin e Prishtinës, Flora Ahmeti, e cila bëri të ditur se informacioni për rastin është marrë rreth orës 06:00 të mëngjesit.
“Rreth orës 06:00 është marrë informata për një person (mashkull) pa shenja jete, në lagjen Ulpiana në Prishtinë. Vdekja e tij është konstatuar nga ekipi i mjekëve emergjentë në vendin e ngjarjes”, tha Ahmeti për media.
Policia e Kosovës, në bashkëpunim me Prokurorinë, ka nisur menjëherë hetimet për të zbardhur rrethanat dhe shkakun e vdekjes së personit.
Identiteti i të ndjerit ende nuk është bërë i ditur dhe autoritetet janë në pritje të rezultateve mjeko-ligjore për të përcaktuar nëse kemi të bëjmë me vdekje natyrale apo ndonjë rast tjetër që kërkon hetim të mëtejshëm.
