PRISHTINË, 31 Maj 2025 – Në prag të vazhdimit të seancës konstituive të Kuvendit të Kosovës, deputetja e Nismës Socialdemokrate, Xhevahire Izmaku, ka ripërsëritur qëndrimin e partisë së saj se Kuvendit i duhet një figurë që mund të sjellë konsensus. Sipas saj, kjo figurë është Fatmir Limaj.
Izmaku theksoi se situata rreth konstituimit të Kuvendit mbetet e pandryshuar, por Nisma mbetet e bindur se zgjidhja qëndron te Limaj. “Nuk ka asgjë të re,” u shpreh Izmaku, duke shtuar se “Nisma konsideron se Kuvendit i duhet një figurë siç është Fatmir Limaj. Një figurë e cila do të sjellë konsensus, pasi që mendojmë që kryetari i Kuvendit është një udhëheqje që ka nevojë të sjellë konsensus mes deputetëve.”
Deputetja e Nismës vuri në dukje rëndësinë e rolit të kryetarit të Kuvendit si një pozicion që kërkon aftësi për të ndërtuar ura bashkëpunimi mes palëve politike. Sipas saj, Limaj posedon cilësitë e duhura për të arritur këtë.
Pavarësisht mungesës së ndonjë vendimi të ri apo zhvillimi thelbësor, Izmaku theksoi se ekziston një “frymë pozitive” në ajër. “Limaj sjell pozitivitet,” përfundoi ajo, duke nënvizuar besimin e Nismës se propozimi i tyre mund të ndihmojë në zhbllokimin e procesit të konstituimit të legjislaturës së re.
