Presidentja e Republikës së Kosovës, Vjosa Osmani, ka shprehur urimet e saj më të përzemërta për Kroacinë me rastin e Ditës së Shtetësisë, përmes një postimi në rrjetin social X (ish-Twitter), duke nënvizuar lidhjet e ngushta dhe miqësinë e qëndrueshme mes dy vendeve.
“Gëzuar Ditën e Shtetësisë popullit kroat!”, ka shkruar Presidentja Osmani, duke shtuar se mes Kosovës dhe Kroacisë ekziston një miqësi e thellë, e ndërtuar mbi vlera të përbashkëta dhe përkushtim të përbashkët ndaj lirisë, demokracisë dhe paqes.
Ajo ka theksuar gjithashtu rëndësinë e mbështetjes së palëkundur që Kroacia i ka dhënë Kosovës gjatë viteve. “Në çdo kapitull të rrugëtimit tonë, Kroacia ka qëndruar përkrah Kosovës, dhe për këtë, mirënjohja jonë është e thellë”, është shprehur Osmani.
Në fund të mesazhit të saj, Presidentja ka shprehur besimin e plotë në forcimin e mëtejmë të bashkëpunimit mes dy vendeve. “Jam e bindur se partneriteti ynë do të vazhdojë të forcohet edhe më tej në vitet që vijnë”, ka përfunduar ajo.
