Jehona Lushaku-Sadriu, Nënkryetare e Lidhjes Demokratike të Kosovës, e sheh të errët perspektivën ekonomike të vendit referuar prodhuesve vendor – një mijë e treqind prej tyre – të cilët nga sot dalin në të ashtuquajturin treg të lirë të energjisë elektrike: treg në të cilin ka vetëm një ofertues, KESCO-n, me çmim tre fish më të lartë: kësisoji çmimet e energjisë duke tejkaluar edhe vendet me ekonomi më të zhvilluara si Holanda apo Franca. Lushaku-Sadru parasheh që “nga sot” nis falimentimi i prodhuesve vendor dhe shembja e ekonomisë së vendit “edhe ashtu e rënduar”.
Postimi i plotë:
BLEJE TËNDEN DIKUR – E SOT, GODITE TËNDEN!
A ju kujtohet kur VV bënte thirrje për prodhime vendore me moton “Bleje tënden”? Gjojase, përkrahje për prodhuesit tanë!
E prej sot, me bekimin e Kurtit dhe qeverisë në ikje, hyn në fuqi shtrenjtimi i energjisë elektrike për prodhuesit vendor.
Kjo është një goditje e drejtpërdrejtë ndaj ekonomisë vendore, që prek çdo produkt që blejmë, çdo tryezë familjare, çdo xhep të qytetarëve.
Nga sot nis rritja e çmimeve për çdo gjë që prodhohet në Kosovë.
Nga sot fillon falimentimi i ngadaltë i prodhuesve tanë.
Nga sot nis shembja e ekonomisë sonë, edhe ashtu të rënduar.
Nga sot rritet barra mbi supet e qytetarëve që mezi po e lidhin muajin me muaj.
Kjo nuk është ndihmë për prodhimin vendor; ky është sabotim!
Kjo nuk është zhvillim; kjo është tradhti ndaj ekonomisë tënde.
Sepse kur godet prodhuesin tënd, godet qytetarin tënd.
Godet vetë shtetin!
