Anëtari i Kryesisë së Lidhjes Demokratike të Kosovës (LDK), Muhamet Hamiti, ka shprehur shqetësimin e tij për situatën e rëndë politike dhe ekonomike në vend, duke akuzuar Qeverinë Kurti si përgjegjësen kryesore për vendosjen e sanksioneve nga Bashkimi Evropian ndaj Kosovës.
Përmes një reagimi të publikuar në profilin e tij në Facebook, Hamiti ka theksuar se për gati dy vjet, Kosova ndodhet nën masa ndëshkuese të BE-së, të cilat ai i konsideron të rënda dhe të dëmshme për imazhin dhe zhvillimin e vendit. Ai ka rikujtuar se më 28 qershor 2023, Komisioni Evropian miratoi ato që në mënyrë diplomatike u cilësuan si “masa të përkohshme dhe të kthyeshme”, por që në praktikë kanë pezulluar fonde të mëdha dhe kanë ndikuar drejtpërdrejt në jetën e qytetarëve.
“Sanksionet kanë pezulluar mbi 600 milionë euro në fonde që do të ndihmonin zhvillimin ekonomik dhe institucional të Kosovës. Pasojat i ndjejnë qytetarët, dhe imazhi i shtetit tonë është goditur rëndë në sytë e bashkësisë ndërkombëtare”, shkroi Hamiti.
Ai ka kritikuar ashpër retorikën e Qeverisë në largim, e cila sipas tij, përpiqet të paraqesë propagandë për “suksese imagjinare” në kohën kur vendi përballet me izolim ndërkombëtar dhe kriza të brendshme.
“Qeveria bën propagandë për gjoja suksese në kohën e bllokadës së jashtme dhe të brendshme, të krizës shoqërore, ekonomike dhe politike në vendin tonë”, shtoi Hamiti.
Deklaratat e tij vijnë në një kohë kur qeveria aktuale është përballur me kritika të vazhdueshme nga opozita dhe akterë ndërkombëtarë për qasjen ndaj dialogut me Serbinë dhe mospërmbushjen e disa kushteve kyçe të vendosura nga BE-ja.
LDK-ja ka bërë thirrje të përsëritura për përgjegjësi institucionale dhe një qasje më konstruktive ndaj partnerëve ndërkombëtarë, duke kërkuar që vendi të dalë nga izolimi diplomatik dhe të rifitojë besimin e BE-së dhe SHBA-së.
Në fund të postimit të tij, Hamiti ka nënvizuar nevojën për ndryshim të qasjes politike dhe për një lidership që e vendos interesin shtetëror dhe qytetar mbi interesin partiak.
