Analisti Lorenc Vangjeli ka komentuar rritjen dhe zgjerimin e influencës së grupeve kriminale shqiptare në arenën ndërkombëtare, duke theksuar se pavarësisht zhvillimit të tyre, ato nuk mund të konsiderohen si “mbretërit e kokainës”.
I ftuar në emisionin “Debat” me gazetaren Alba Alishani në A2 CNN, Vangjeli tha se në dekadën e fundit grupet kriminale shqiptare kanë njohur një rritje të madhe, sidomos në aspektin logjistik dhe financiar, falë trafikut të kanabisit.
“Me trafikun e kanabisit, grupet kriminale shqiptare arrijnë të sigurojnë logjistikë, financën e nevojshme, kontaktet e duhura. Një grup, i cili është i aftë të kalojë nga njëra anë e detit 1 ton kanabis, do ta kishte shumë më të lehtë ta bënte këtë me 100 kg kokainë”, u shpreh Vangjeli.
Sipas tij, kjo ka qenë pika e parë e depërtimit të këtyre grupeve në hallkën fillestare të zinxhirit të trafikut në vendet e origjinës së drogës.
Fillimisht, sipas Vangjelit, informacionet që vinin nga Amerika Latine për përfshirjen e shqiptarëve ishin të fragmentuara, por me kalimin e kohës situata ndryshoi ndjeshëm.
“Në harkun e 10 viteve, këto grupe kriminale kanë arritur të kontrollojnë të gjitha hallkat e këtij zinxhiri,” shtoi ai. Megjithatë, Vangjeli hodhi poshtë kategorikisht pretendimet se grupet shqiptare janë në krye të tregut botëror të kokainës.
“Nuk e besoj dot, pasi më duket e pamundur, deklarimet politike që i klasifikojnë shqiptarët si majën apo mbretërit e tregut të kokainës. Ata e kanë një pjesë, por ne ja shumëzojmë shpesh me 100. Ata janë bërë shumë të dukshëm, por në mënyrë absolute nuk qëndrojnë në krye të kupolës”, përfundoi analisti.
