Tiranë, 3 qershor 2025 – Federata Shqiptare e Futbollit (FSHF) ka njoftuar zgjatjen e afatit të shortit elektronik për përzgjedhjen e tifozëve që do të kenë të drejtë të blejnë bileta për supersfidën Shqipëri–Serbi, e vlefshme për kualifikueset e Kampionatit Botëror “FIFA World Cup 2026”.
Procesi do të vijojë edhe gjatë datave 3 dhe 4 qershor, për shkak të numrit rekord të aplikimeve dhe ngarkesës së lartë në sistemin elektronik. Sipas FSHF-së, kjo zgjatje është bërë e domosdoshme për të garantuar një proces të drejtë, transparent dhe të barabartë për të gjithë aplikuesit.
“Një pjesë e tifozëve janë përzgjedhur tashmë përmes sistemit të shortit elektronik dhe kanë marrë biletat e tyre përmes platformës zyrtare të menaxhuar nga kompania T-Ticket”, thuhet në njoftimin zyrtar të federatës.
FSHF i bën thirrje të gjithë personave që kanë aplikuar të kontrollojnë rregullisht email-et e tyre, përfshirë dosjen e Spam, për të parë nëse kanë marrë njoftimin me linkun e personalizuar për blerjen e biletave. Vetëm përzgjedhurit do të marrin një email zyrtar – për të tjerët nuk do të dërgohet asnjë njoftim.
Në përfundim të procesit më 4 qershor, nëse nuk është marrë një konfirmim nga T-Ticket, kjo nënkupton se aplikanti nuk është përzgjedhur në short.
Federata u shpreh mirënjohëse për interesin masiv dhe durimin e treguar nga tifozët, duke theksuar se çdo hap i këtij procesi është ndërtuar mbi parimet e korrektësisë dhe transparencës së plotë.
