Fondacioni Humanitar për Gazën (GHF), i mbështetur nga SHBA, ka pezulluar përkohësisht shpërndarjen e ndihmave për të mërkurën, pas incidentit tragjik ku dhjetëra palestinezë u vranë pranë një pike ndihmash. Organizata i ka bërë thirrje Izraelit të përmirësojë sigurinë për civilët dhe të ofrojë udhëzime më të qarta për të shmangur situata të rrezikshme dhe konfuzion.
“Prioriteti ynë kryesor mbetet siguria dhe dinjiteti i civilëve që marrin ndihma,” tha një zëdhënës i GHF, ndërsa ushtria izraelite paralajmëroi civilët që të mos afrohen në zonat që çojnë në pikat e shpërndarjes, duke i quajtur “zona lufte”.
Incidenti ndodhi një ditë më parë kur ushtria izraelite hapi zjarr ndaj një grupi njerëzish pranë një pike ndihmash, duke lënë të paktën 27 të vdekur dhe dhjetëra të plagosur, sipas Kryqit të Kuq. GHF tha se sulmi ndodhi “shumë përtej” perimetrit të tyre të kontrollit.
Ndërkohë, Këshilli i Sigurimit i OKB-së pritet të votojë për një armëpushim dhe lehtësim të qasjes humanitare në Gaza, ku shpërndarja e ndihmave mbetet e rrezikshme dhe e kufizuar. Zëdhënësi i OKB-së, Stephane Dujarric, e quajti situatën “të papranueshme” dhe modelin aktual të ndihmave një “recetë për katastrofë”.
GHF, i krijuar vetëm një javë më parë, thotë se ka shpërndarë mbi shtatë milionë vakte dhe u bën thirrje organizatave të tjera humanitare që të bashkëpunojnë për të garantuar ndihmë më të sigurt për popullsinë e rrezikuar të Gazës.
