Oda Ekonomike e Kosovës, në bashkëpunim me përfaqësues të sektorit privat, ka zhvilluar një takim me bizneset e prekura nga vendimi i Zyrës së Rregullatorit të Energjisë (ZRrE) për daljen në tregun e lirë të energjisë elektrike.
Pas diskutimeve, u bë e ditur se më 11 qershor, nga ora 11:00, do të organizohet një protestë paqësore në sheshin e Prishtinës, nëse ZRrE-ja dhe Qeveria nuk reflektojnë ndaj kërkesave të bizneseve.
Rritja e çmimit të energjisë elektrike ka alarmuar sektorin privat, ku përfaqësues të odave ekonomike kanë deklaruar se rreth 400 fabrika po shqyrtojnë mundësinë e mbylljes së operacioneve për shkak të kostove të larta.
Në takimin e mbajtur me dyer të mbyllura, disa biznese kanë ngritur shqetësimin se Korporata Energjetike e Kosovës (KEK) po i kërcënon me ndërprerjen e furnizimit me energji nëse nuk nënshkruajnë kontrata të reja.
Kryetari i Odës Ekonomike të Kosovës, Lulzim Rafuna, u shpreh se bizneset kërkojnë nga Qeveria dhe ZRrE-ja të lejojnë një fazë tranzicioni për përshtatjen në tregun e lirë. Ai potencoi se, në mungesë të reflektimit, komuniteti i biznesit dhe punëtorët do të protestojnë për të shprehur pakënaqësinë ndaj vendimit.
Ndërkohë, Kryetari i Dhomës së Tregtisë dhe Industrisë, Skender Krasniqi, kritikoi KEK-un për presion ndaj bizneseve, duke theksuar se ndërprerja e energjisë nuk mund të bëhet gjatë periudhës 60-ditore. Ai kërkoi nga institucionet që të parandalojnë krizën energjetike që po rrezikon qindra vende pune.
Nga ana tjetër, Kryetari i Odës Ekonomike Amerikane në Kosovë, Arian Zeka, e cilësoi mbylljen e furrës së fundit nga Feronikeli si një shembull të ndikimit negativ të liberalizimit të papërgatitur të tregut të energjisë. Ai theksoi se ZRrE-ja është dashur të sigurohet paraprakisht që tregu të jetë funksional.
Bizneset e pranishme në takim paralajmëruan se situata është kritike dhe se, në mungesë të veprimeve konkrete, vendi mund të përballet me mbyllje masive të fabrikave.
