Shtetet e Bashkuara planifikojnë të ndryshojnë strategjinë e vendosjes së trupave të tyre ushtarake globalisht, duke u fokusuar në mbrojtjen e kufirit jugor dhe forcimin e pranisë në rajonin Indo-Paqësor. Këtë e ka bërë të ditur Sekretari i Mbrojtjes, Pete Hegseth, gjatë një takimi të ministrave të mbrojtjes të NATO-s në Bruksel.
Sipas Hegseth, strategjia e re mbrojtëse synon të sigurojë kontroll operacional të plotë mbi kufirin jugor të SHBA-së, ndërkohë që forcat amerikane do të zhvendosen në rajonin Indo-Paqësor për të përforcuar aftësitë parandaluese në atë zonë.
“Amerika nuk mund të jetë kudo gjatë gjithë kohës dhe as nuk duhet të jetë,” deklaroi ai, duke theksuar se ky riorganizim do të mundësojë një ndarje më efikase të barrës së mbrojtjes globale.
Aktualisht, SHBA ka rreth 1,000 baza ushtarake në mbarë botën, ku numri më i madh i trupave është i stacionuar në Japoni, Gjermani dhe Korenë e Jugut. Gjithashtu, mijëra ushtarakë amerikanë janë të dislokuar në zona të konfliktit si Siria dhe Iraku.
Ky riorganizim vjen në një kohë kur administrata amerikane po rishikon pozicionimin e forcave të saj për të adresuar sfidat e reja strategjike në sigurinë globale
