Organizata ndërkombëtare policore Interpol ka njoftuar për arrestimin e 20 personave në Evropë dhe Amerikë, pas një operacioni të gjerë në bashkëpunim me 12 shtete, i fokusuar në luftimin e abuzimit seksual me fëmijë.
Operacioni, i udhëhequr nga policia spanjolle, u iniciua në fund të vitit të kaluar, pasi autoritetet zbuluan rrjete online ku qarkullonin imazhe të shfrytëzimit seksual të të miturve. Autoritetet spanjolle arrestuan shtatë të dyshuar, përfshirë një punëtor shëndetësor dhe një mësues.
Sipas Interpolit, punëtori shëndetësor dyshohet se ka paguar të miturit në Evropën Lindore për imazhe eksplicite, ndërsa mësuesi është akuzuar për posedim dhe shpërndarje të materialeve të abuzimit seksual me fëmijë në platforma online.
Në Amerikën Latine u arrestuan 10 persona në shtatë shtete, përfshirë tre në El Salvador dhe një mësues në Panama. Arrestime të tjera u kryen në pjesë të ndryshme të Evropës dhe Shteteve të Bashkuara.
Interpol njoftoi se hetimet vazhdojnë, ndërsa deri më tani janë identifikuar edhe 68 të dyshuar të tjerë. Autoritetet janë të angazhuara për të goditur rrjetet kriminale që përfshihen në shfrytëzimin seksual të të miturve.
