Një arritje madhështore për sportin dhe krenarinë kombëtare: Mrika dhe Arianit Nikçi, alpinistë nga Peja, janë bërë zyrtarisht pjesë e Librit të Rekordeve Guinness, si babë e bijë që më së shpejti në histori kanë ngjitur shtatë majat më të larta të shtatë kontinenteve të botës, të njohura si “Seven Summits”.
Lajmi u bë i ditur nga Federata e Bjeshkatarisë dhe Ngjitjes Sportive e Kosovës, e cila thekson se kjo dyshe e jashtëzakonshme ka përfunduar sfidën në një kohë rekorde – 1 vit e 202 ditë, nga 25 janari 2018 deri më 15 gusht 2019.
“Ky vlerësim botëror konfirmon arritjen e jashtëzakonshme të dy alpinistëve shqiptarë, të cilët brenda vetëm kësaj periudhe kohore ngjitën majat më të larta të çdo kontinenti: Everest (Azi), Aconcagua (Amerika e Jugut), Denali (Amerika e Veriut), Kilimanjaro (Afrikë), Elbrus (Evropë), Carstensz Pyramid (Oqeani) dhe Vinson Massif (Antarktikë),” thuhet në njoftim.
Ky sukses shënon një moment historik për Kosovën dhe shqiptarët, duke e vendosur për herë të parë emrin e shtetit tonë në një rekord botëror të nivelit më të lartë në sportet ekstreme.
Mrika Nikçi është tashmë e njohur si femra më e re në botë që ka realizuar këtë sfidë, ndërsa babai i saj, Arianiti, ka qenë udhëheqësi dhe mbështetësi kyç në këtë rrugëtim të jashtëzakonshëm.
Ky rekord shkon përtej statistikave – ai përfaqëson forcën e vullnetit, disiplinës, përkrahjes familjare dhe dashurisë për natyrën. Nga një vend i vogël si Kosova, në majat më të larta të botës, Mrika dhe Arianiti dëshmuan se asgjë nuk është e pamundur kur ekziston përkushtimi.
Ky sukses frymëzon gjeneratat e reja shqiptare dhe i dërgon botës një mesazh të qartë: shqiptarët janë të aftë të ngjitin çdo majë – qoftë ajo reale apo simbolike.
