Sot shënohet 26-vjetori i Marrëveshjes së Kumanovës, dokumenti historik që shënoi fundin e luftës në Kosovë dhe fillimin e tërheqjes së ushtrisë, policisë dhe paramilitarëve serbë, të cilët për më shumë se një dekadë kishin terrorizuar popullatën shqiptare të paarmatosur.
Në këtë përvjetor, ka reaguar edhe kryetari i AAK-së dhe ish-komandanti i UÇK-së në Zonën Operative të Dukagjinit, Ramush Haradinaj, i cili në një postim kujtoi se Marrëveshja e Kumanovës ishte rezultat i një lufte çlirimtare të drejtë dhe të pastër, që kishte fituar besimin dhe përkrahjen e botës demokratike.
“Lufta çlirimtare e UÇK-së, me kauzën e saj të drejtë dhe pastërtinë, kishte arritur të bashkojë në ndihmë të saj të gjitha shtetet demokratike, NATO-n, e udhëhequr nga Amerika, e cila për tre muaj rresht bombardoi Jugosllavinë, shtetin e fundit fashist në Evropë”, shkroi Haradinaj.
Ai kujtoi se për ata që mbijetuan “ferrin e luftës”, Marrëveshja e Kumanovës ishte kulmi i një periudhe të gjatë dhe të dhimbshme.
“Më të vështirat ishin vitet 1990 deri më 1996, ndërsa nga 1997 deri më 1999 ndodhën dy mrekulli që ndryshuan rrjedhën e historisë sonë: së pari, na besoi dhe na përkrahu kombi ynë shqiptar; së dyti, na besuan dhe na qëndruan pranë Amerika dhe NATO.”
Haradinaj theksoi se populli i Kosovës do të mbetet përjetësisht mirënjohës ndaj aleatëve për lirinë dhe pavarësinë e fituar me gjak dhe sakrificë.
“Shqiptarët përjetësisht i janë falënderues Amerikës për secilën etapë të historisë sonë!”, përfundoi ai.
Marrëveshja e Kumanovës, e nënshkruar më 9 qershor 1999, i dha fund luftës së përgjakshme në Kosovë dhe hapi rrugën për vendosjen e trupave paqeruajtëse të NATO-s (KFOR) dhe fillimin e një kapitulli të ri për vendin në rrugën drejt lirisë dhe pavarësisë.
