Rrjeti i organizatave joqeveritare Avonet ka shprehur shqetësime lidhur me praktikën e angazhimit të asistentëve personalë për deputetët e Kuvendit të Kosovës, duke e cilësuar atë si të paarsyeshme dhe në kundërshtim me rolin e deputetëve në sistemin parlamentar.
Kenan Gashi, përfaqësues i Avonet, ka deklaruar se deputetët nuk kanë nevojë për asistentë personalë, pasi funksioni i tyre si përfaqësues të zgjedhur duhet të jetë i fokusuar në punën brenda komisioneve parlamentare.
“Deputetët e Kuvendit nuk mund të kenë asistentë personalë, sepse roli i tyre si deputet duhet të funksionojë mbi bazën e punës në Komisionet Parlamentare. Asistentët duhet të jenë të angazhuar për detyra që lidhen me këto komisione,” u shpreh Gashi për media.
Ai po ashtu ka ngritur dyshime mbi efikasitetin e deputetëve aktualë, duke vlerësuar se angazhimi i asistentëve është më shumë simbolik sesa funksional.
“Deputetët nuk e kanë marrë rolin e plotë si përfaqësues, sepse nuk po e ushtrojnë siç duhet funksionin e tyre. Ata që kanë marrë asistentë nuk i takojnë një partie të mirë dhe nuk po mbrojnë buxhetin,” shtoi ai.
Avonet kërkon rishikimin e kësaj praktike, duke theksuar nevojën për një qasje më transparente dhe të orientuar drejt funksionit të vërtetë parlamentar.
