Gjykata e Posaçme e Apelit pritet të shqyrtojë sot kërkesën e kryebashkiakut të pezulluar të Tiranës, Erion Veliaj, për t’u liruar nga masa e sigurisë “arrest në burg”. Seanca është planifikuar të mbahet në orën 14:00.
Veliaj u arrestua më 10 shkurt 2025, me urdhër të SPAK, nën akuzën për “korrupsion pasiv” në 9 raste dhe “pastrim parash”. Kohët e fundit, Prokuroria e Posaçme i ka shtuar edhe një akuzë të re: “fshehje të pasurisë”.
Aktualisht, vendimi për masën e sigurisë “arrest në burg”, i vendosur fillimisht në muajin shkurt dhe i lënë në fuqi nga Apeli i Posaçëm më 13 mars, është në shqyrtim edhe në Gjykatën e Lartë.
Avokatët e Veliajt kanë argumentuar se masa është disproporcionale dhe kanë kërkuar lirimin e tij, duke ofruar garanci alternative. Ndërkohë, SPAK insiston se ekziston rrezik për ndikim në hetime dhe prishje të provave.
Seanca e sotme pritet me interes të lartë publik, për shkak të profilit të lartë politik të Veliajt dhe natyrës së rëndë të akuzave që rëndojnë ndaj tij.
