Kandidatja e Lëvizjes Vetëvendosje për kryetare të Kuvendit, Albulena Haxhiu kërkoi “unitet” për konstituimin e Kuvendit.
Ajo tha pas ndërprerjes së 29-të të seancës konstituive se LDK-ja ka “tendencë për të minimizuar vullnetin e popullit, për ta shkelur atë” me propozimin për Qeveri të Unitetit.
“Ne kërkojmë unitet për konstituimin e Kuvendit”, tha ajo.
Haxhiu kërkoi “braktisjen” e qëndrimeve për qeveri tranzitore. Ato, ajo tha se “janë kundër vullnetit të popullit”.
“Le të kthehemi të unifikuar për ta konstituuar Kuvendin”, tha ajo, ndërsa përmendi përpjekjet e dështuara të saj për t’u zgjedhur kryeparlamentare, kur u pyet për opsionet e LVV-së.
“Votimi i mbyllur ka ardhur pas gjashtë dështimeve për votim të hapur”, tha ajo.
E pyetur nëse unitetin do të përpiqen ta arrijnë me një emër tjetër për kryetar/e të Kuvendit, Haxhiu tha se propozimi është e drejtë e LVV-së dhe se askush tjetër “s’mund të ndërhyjë” aty.
“Sepse të drejtat kushtetuese janë mbi preferencat individuale apo të subjekteve tjera politike”, tha ajo.
Deputetja në fund përmendi faktin që çështja e votimit të fshehtë për zgjedhjen e kryetarit të Kuvendit po shqyrtohet nga Gjykata Kushtetuese.
“Le ta shohim çka thotë Gjykata Kushtetuese dhe pastaj vazhdojmë”, tha ajo.
