Pas dështimit të seancës konstituive të Kuvendit të Kosovës, kryetari i Partisë Demokratike të Kosovës (PDK), Memli Krasniqi, ka akuzuar Lëvizjen Vetëvendosje (LVV) për pengimin e konstituimit të institucioneve, duke e cilësuar këtë si një bllokadë politike.
Ai rikujtoi se katër muaj më parë, qytetarët përmes votës së lirë vendosën për drejtimin politik të vendit, duke i dhënë fund sundimit të një partie dhe duke i dhënë shumicën parlamentare opozitës.
“Qytetarët dolën në zgjedhje të lira dhe shprehën vullnetin e tyre. Ata i thanë jo sundimit të një partie në katër vitet e kaluara dhe i dhanë shumicën opozitës. Sot, LVV është duke e bllokuar këtë proces, duke penguar konstituimin e Kuvendit. Është kaluar çdo kufi i racionalitetit. Kjo nuk është politikë, por një tentativë për të mbajtur peng vullnetin e qytetarëve të Kosovës,” deklaroi Krasniqi.
Situata politike mbetet e tensionuar, ndërsa palët ende nuk kanë arritur një marrëveshje për tejkalimin e bllokadës. Mbetet për t’u parë se si do të zhvillohen ngjarjet në ditët në vijim.
