Investimet nga Shqipëria në Kosovë kanë shënuar një rritje të ndjeshme, duke arritur në 468 milionë euro deri në fund të vitit 2024. Të dhënat zyrtare të publikuara nga Banka Qendrore e Kosovës (BQK) tregojnë se kjo është një rritje prej 26% krahasuar me vitin 2023.
Falë këtij progresi, Shqipëria është ngjitur në vendin e pestë në listën e investitorëve më të mëdhenj në Kosovë, duke lënë pas shumë vende të tjera të rajonit dhe më gjerë. Kjo e bën Kosovën destinacionin kryesor për kapitalin shqiptar jashtë kufijve shtetërorë.
Sipas strukturës së investimeve, sektori i ndërtimit ka përfituar pjesën më të madhe të kapitalit shqiptar, me rreth 13% të totalit. Pas tij vijnë pasuritë e paluajtshme me 8%, industria përpunuese me 7.7%, si dhe sektori i tregtisë me rreth 5%. Ndërkohë, për arsye konfidencialiteti, të dhënat për sektorët e financës dhe energjisë nuk janë bërë publike, edhe pse besohet se përfaqësojnë një pjesë të rëndësishme të investimeve.
Sipas analistëve ekonomikë, kjo rritje është rezultat i disa faktorëve kyç: lehtësimi i lëvizjes mes dy vendeve, lidhjet kulturore e gjuhësore, si dhe një klimë biznesi gjithnjë e më e favorshme në Kosovë.
Gjithashtu, bashkëpunimi institucional mes Shqipërisë dhe Kosovës ka njohur një intensifikim të vazhdueshëm në dekadën e fundit. Deri më sot, dy vendet kanë firmosur mbi 180 marrëveshje bashkëpunimi, duke përfshirë fushat e ekonomisë, energjisë, transportit, arsimit dhe sigurisë.
Këto marrëveshje kanë ndihmuar në krijimin e një ambienti të qëndrueshëm dhe tërheqës për investitorët, duke forcuar më tej lidhjet ekonomike dhe politike mes dy vendeve.
Ekspertët presin që ky trend të vazhdojë edhe në vitet në vijim, me projekte të reja në infrastrukturë, energji dhe sektorë strategjikë, që pritet të forcojnë më tej bashkëpunimin ekonomik Shqipëri–Kosovë.
