Në konferencën WWDC 2025, Apple prezantoi një sërë risish në kuadër të përmirësimeve të “Apple Intelligence”, megjithëse pa shkaktuar bujë. Ndër funksionet më të përfolura ishte “Visual Intelligence” – një veçori e re që u mundëson përdoruesve të ndërveprojnë me atë që shohin në ekranin e tyre, duke identifikuar objekte dhe duke sugjeruar veprime të lidhura me to përmes ChatGPT apo kërkimeve në aplikacione si Google dhe Etsy.
Kjo teknologji e re sjell Apple më pranë konkurrentëve si Google, duke e afruar me konceptin e “agentic AI” – inteligjencë që nuk jep vetëm përgjigje, por edhe vepron për përdoruesin. Edhe pse aktualisht është ende në fazë teorike, funksioni është projektuar të funksionojë në pajisje, pa përdorim të të dhënave në cloud.
Përveç kësaj, Apple prezantoi dhe funksione të tjera si përkthimi i drejtpërdrejtë në Messages dhe FaceTime, përmirësime në Genmoji dhe Image Playground, si edhe hapjen e modelit bazë të Apple Intelligence për zhvilluesit e aplikacioneve.
Apple theksoi se aplikacionet do të mund të përdorin këtë teknologji pa kosto shtesë dhe në mënyrë të sigurt për privatësinë, madje edhe kur përdoruesit janë offline. Megjithatë, mungesa e përmirësimit të pritur të Siri dhe ritmi i ngadaltë i zhvillimeve në fushën e AI janë sinjale se Apple ende po përpiqet të kapë hapin me rivalët në këtë sektor në zhvillim të shpejtë.
