Qeveria e Kosovës ka miratuar vendimin për pranimin dhe zhvendosjen e përkohshme të shtetasve të vendeve të treta nga Shtetet e Bashkuara të Amerikës, duke rikonfirmuar partneritetin e saj me aleatin e saj strategjik.
Kryeministri në detyrë, Albin Kurti, deklaroi se ky vendim është rezultat i kërkesës së SHBA-së dhe se procesi do të realizohet në një periudhë njëvjeçare, gjatë së cilës Kosova do të strehojë deri në 50 individë.
“Sipas këtij vendimi, shteti ynë brenda një periudhe njëvjeçare do të pranojë dhe strehojë deri në 50 individë me qëllim të lehtësimit të kthimit të tyre të sigurt në vendin e prejardhjes. Përzgjedhja e këtyre personave do të bëhet nga një listë e propozuar, për aq sa ata i plotësojnë kriteret e caktuara lidhur me sundimin e ligjit dhe rendin publik,” deklaroi Kurti.
Ai gjithashtu theksoi se gjatë qëndrimit të tyre në Kosovë, të gjithë individët do të veprojnë në përputhje me legjislacionin në fuqi dhe do të gëzojnë të drejtat e përcaktuara në bazë të ligjeve të vendit.
Kurti ripërsëriti rëndësinë e marrëdhënieve të Kosovës me SHBA-në, duke e cilësuar atë si një aleat të palëkundur. “Republika e Kosovës do të jetë gjithmonë partner i besueshëm i SHBA-së. U jemi përherë mirënjohës për ndihmën dhe bashkëpunimin e vazhdueshëm, sidomos në rrugëtimin tonë drejt integrimit euroatlantik,” theksoi ai.
Ky zhvillim nënvizon thellimin e bashkëpunimit mes dy vendeve dhe rikonfirmon rolin e Kosovës si partner i besueshëm në çështje të sigurisë dhe stabilitetit global. Çfarë ndikimi mund të ketë ky vendim në marrëdhëniet diplomatike dhe politike të Kosovës? Kjo mbetet për t’u parë në javët e ardhshme.
