Sot, me nderime të larta shtetërore u përcolle për në banesën e fundit një nga figurat më të rëndësishme të historisë politike të Kosovës, Bujar Bukoshi.
Mjek, politikan dhe atdhetar i përkushtuar, Bukoshi u nda nga jeta duke lënë pas një trashëgimi të thellë në historinë moderne të vendit.
Ceremonia mortore u mbajt në Prishtinë, ku morën pjesë udhëheqës shtetërorë, miq, kolegë, përfaqësues të institucioneve dhe qytetarë të shumtë, të cilët erdhën për të nderuar jetën dhe veprën e tij.
Flamuri kombëtar e mbuloi arkivolin e tij, ndërsa fjalët e lamtumirës theksuan kontributin e madh që Bukoshi dha në periudhat më të vështira të Kosovës.
Bujar Bukoshi është kujtuar si një prej themeluesve të lëvizjes politike për pavarësinë e Kosovës. Si kryeministër i Qeverisë së Republikës së Kosovës në ekzil, ai luajti një rol kyç në organizimin dhe përfaqësimin ndërkombëtar të çështjes shqiptare në vitet ’90
Me përkushtim të rrallë, ai angazhoi mjekësinë, diplomacinë dhe politikën në shërbim të çështjes kombëtare.
Në fjalët e mbajtura gjatë ceremonisë, u theksua se ndonëse Bujar Bukoshi nuk është më fizikisht mes nesh, vepra e tij mbetet një gur themeli në rrugën e shtetformimit dhe identitetit të Kosovës.
I ndjeri, Bujar Bukoshi u varros në Kompleksin e Dëshmorëve në lagjen Velania në Prishtinë
