Një zbulim i ri ka tronditur fansat e hip-hop-it: Eminem fillimisht kishte menduar që Mariah Carey të luante rolin e nënës së tij në filmin ‘8 Mile’.
Filmi, i cili u publikua në vitin 2002 dhe ishte i bazuar pjesërisht në jetën e reperit, pati sukses të madh si tek kritika ashtu edhe tek publiku.
Kim Basinger e portretizoi nënën e protagonistit, por sipas producentit Damion “Damizza” Young, Eminem fillimisht kishte synuar që këtë rol ta luante Mariah Carey.
Në atë kohë, Carey ishte vetëm katër vite më e madhe se Eminem, gjë që e bëri ofertën të duket e pazakontë. Young ka treguar se ai e këshilloi këngëtaren të mos e pranonte rolin, pasi nuk ishte i përshtatshëm për moshën e saj.
Sipas tij, Eminem e kontaktoi për të organizuar një takim me Carey, por ajo refuzoi menjëherë. Kur më në fund u zhvillua një telefonatë mes tyre, reperi i tha drejtpërdrejt: “Dua që të luash nënën time”, gjë që e bëri Carey të ndihej e pasigurt.
Në fund, roli iu dha Kim Basinger, e cila u vlerësua për interpretimin e saj të fuqishëm. Filmi mbeti një moment kyç në karrierën e Eminem-it, duke i sjellë atij një Çmim Oscar për këngën ‘Lose Yourself’.
Ky episod është vetëm një pjesë e historisë së ndërlikuar mes Eminem-it dhe Carey-t, të cilët kanë pasur një marrëdhënie të tensionuar për vite me radhë.
