Kosova do të synojë medalje të reja në Kampionatin Botëror të xhudos, i cili do të mbahet në Budapest të Hungarisë nga 13 deri më 20 qershor.
Një nga ngjarjet më të mëdha të vitit në sportin e xhudos është gati të nisë. Kjo pasi Kampionati Botëror për Senior, një arenë ku garojnë xhudistët më të mirë, pret 557 xhudistë nga 93 shtete, në përfaqësim të 6 kontinenteve.
Kosova, i njohur si shteti i medaljeve olimpike, përfaqësohet me krenari nga Distria Krasniqi (-52kg),Laura Fazliu (-63kg) dhe Akil Gjakova (-73kg).
Distria Krasniqi do të ndeshet ditën e shtunë, Akil Gjakova të dielën, kurse Laura Fazliu do të ndeshet të hënën.
Garuesit tanë do të jenë nën udhëheqjen e kryemjeshtrit Driton Kuka dhe trajnerëve Fatos Tabaku dhe Majlinda Kelmendi.
