Presidenti francez Emmanuel Macron ka kërkuar rregulla më të forta për të kufizuar përdorimin e rrjeteve sociale nga fëmijët nën 15 vjeç, duke paralajmëruar një nismë të re në nivel të Bashkimit Evropian. Komentet e tij vijnë pas therjes fatale të një punonjësi shkolle nga një nxënës 14-vjeçar në qytetin Nogent, në lindje të Francës.
“S’mund të presim gjatë. Nëse BE-ja nuk vepron, do të fillojmë menjëherë në Francë,” deklaroi Macron në një intervistë televizive për France 2, vetëm disa orë pas incidentit tragjik në shkollë.
Sipas autoriteteve, viktima 31-vjeçare u sulmua me thikë gjatë një kontrolli të çantave për armë, ndërsa ngjarja tronditi opinionin publik dhe rindezi debatin për ndikimin e rrjeteve sociale tek të rinjtë.
Kryeministri François Bayrou nënvizoi në parlament se ky nuk është një rast i izoluar dhe e lidhi rritjen e dhunës në shkolla me ndikimin negativ të platformave digjitale.
Në një postim në platformën X (ish-Twitter), Macron bëri thirrje për zbatim të teknologjive të verifikimit të moshës nga platformat, duke theksuar se kjo është e realizueshme dhe mbështetet nga ekspertët.
Ky propozim vjen në një kohë kur vende si Australia tashmë kanë miratuar ndalime të ngjashme, ndërsa Franca synon të udhëheqë debatin brenda BE-së për të mbrojtur më mirë të miturit në hapësirën digjitale./Reuters
