Gazetari hulumtues Lirim Mehmetaj ka publikuar një investigim që ngre dyshime të forta për parregullsi dhe abuzime në Ministrinë e Kulturës, Rinisë dhe Sporteve. Në postimin e tij, Mehmetaj kritikon hapur ministrin Hajrullah Çeku, duke e cilësuar atë si përgjegjësin kryesor për këto veprime të dyshuara korruptive.
Një nga çështjet më të theksuara në këtë investigim është dhënia e një burse prej 14 mijë eurosh për Dorina Deçanin, një zyrtare administrative në kabinetin e ministrit Çeku. Sipas Mehmetajt, ky financim është bërë nga vetë ministria ku ajo punon, nën pretekstin e “rritjes së kapaciteteve profesionale për të rinjtë”, duke ngritur pikëpyetje mbi transparencën dhe kriteret e ndarjes së fondeve.
Gazetari e sheh këtë rast si një simptomë të një problemi më të madh, duke ngritur alarmin për abuzime të mundshme me fondet publike nga zyrtarë të lartë të ministrisë.
