Aktori i njohur Brad Pitt është angazhuar në një turne mediatik për të promovuar filmin e tij më të ri me temë garat automobilistike, F1. Por ky promovim vjen në një moment të veçantë për aktorin, pasi është i pari turne që nga finalizimi i divorcit të tij të gjatë dhe të vështirë me Angelina Jolie.
Pas një beteje ligjore që zgjati plot tetë vjet, Pitt dhe Jolie e përfunduan zyrtarisht martesën në dhjetor të vitit të kaluar. Megjithatë, komentet e Pitt mbi këtë çështje kanë nxitur polemika, pasi ai ka minimizuar rëndësinë e procedurës ligjore duke thënë se nuk e konsideron atë si “ndonjë gjë të madhe”.
Duke folur për mediat, Pitt ka shmangur në mënyrë të hapur diskutimet mbi divorcin, por është shprehur në terma të përgjithshëm mbi gabimet e së kaluarës: “Pavarësisht nga gabimi, mëson prej tij dhe ecën përpara,” tha ai, duke nënvizuar se çdo përvojë është një hap drejt suksesit.
Ndërkohë, aktori është në një lidhje me Ines de Ramon, e cila ka qenë përkrah tij gjatë gjithë këtij turneu promovues.
Në një event, Pitt u pyet për mundësinë e një bashkëpunimi të ri me Tom Cruise, me të cilin ka punuar në filmin “Interview with the Vampire”. Me një shaka për skenat e rrezikshme që Cruise preferon, Pitt tha: “Nuk do të varem nga ndonjë avion apo budallallëqe të tilla, kështu që ndoshta kur ai të bëjë diçka që është në tokë.”
Kjo deklaratë ka nxitur reagime të shumta, duke kujtuar se një përplasje në një avion ishte incidenti që e shtyu Jolie-n të kërkonte divorcin nga Pitt. Ndërsa aktori vazhdon promovimin e filmit, është e qartë se diskutimet mbi jetën e tij personale nuk po largohen nga vëmendja e publikut.
Megjithatë, për Pitt, fokusi kryesor mbetet karriera e tij dhe projektet e ardhshme në Hollywood.
