Komuna e Vushtrrisë ka shënuar sot 26 vjetorin e çlirimit me një sërë aktivitetesh përkujtimore dhe festive.
Kryetari i Komunës, Ferit Idrizi, së bashku me kabinetin qeveritar dhe përfaqësuesit e Shoqatave të dala nga lufta e UÇK-së, kanë zhvilluar homazhe në disa pika simbolike të qytetit.
Ceremonia ka nisur me nderime te përmendorja e Dëshmorëve, më pas te përmendorja e Martirëve dhe shtatorja e Hasan Prishtinës, duke kulmuar në Kompleksin e Dëshmorëve të Kombit në Bletaj.
Në akademinë solemne, u ndanë disa dekorata të veçanta për personalitetet që kanë kontribuar në fusha të ndryshme. “Krenaria e Sportit” iu dha KH “Samdrexha” Femrat U-18, G.T. “Forca” dhe Erjon Morinës (p.m.), ndërsa “Pena e Artë” u akordua për Prof.dr. Mentor Hasanin. Për kontributin e tij të çmuar, Dibran Perçuku u nderua me çmimin “Emblema e Vushtrrisë”.
Me mirënjohje u nderuan edhe figura të tjera të shquara për kontributin e tyre në komunitet. Në fjalën e tij, kryetari Idrizi përmendi sakrificën e të rënëve dhe rëndësinë e ruajtjes së kujtesës historike.
“Ky përvjetor na kujton rëndësinë e sakrificës dhe guximit të brezave që luftuan për lirinë dhe të drejtën tonë. Urime Ditën e Çlirimit Vushtrri!”, tha ai.
Ceremonia u pasurua me këngë dhe valle të interpretuara nga Ansambli i Këngëve dhe Valleve “Hasan Prishtina”, duke i dhënë një atmosferë festive eventit.
Kjo ditë mbetet një moment i rëndësishëm për qytetarët e Vushtrrisë, duke dëshmuar krenarinë dhe përkushtimin e tyre ndaj historisë së lavdishme të kombit.
