Deputetja e Lidhjes Demokratike të Kosovës (LDK), Prof. Dr. Serbeze Kabashi-Muçaj, ka reaguar publikisht pas raportimeve në media që e lidhnin me një takim të mundshëm me kryeministrin në largim Albin Kurti.
Përmes një deklarate të publikuar në profilin e saj zyrtar në Facebook, Kabashi-Muçaj ka mohuar kategorikisht çdo përfshirje apo kontakt me përfaqësues të Lëvizjes Vetëvendosje, duke theksuar se qëndrimi i saj politik mbetet i pandryshuar.
“Nuk kam dhe nuk do të ushtroj asnjëherë votë individuale për ndonjë parti politike jashtë vullnetit të Grupit Parlamentar të Lidhjes Demokratike të Kosovës”, shkruan ndër të tjera deputetja, duke e bërë të qartë se çdo vendim i saj do të jetë në përputhje të plotë me qëndrimet e LDK-së.
Ajo ka hedhur poshtë zërat për ndonjë devijim nga linja partiake, duke theksuar se vendimmarrja e saj është e bazuar në unitetin dhe koordinimin me strukturat e partisë dhe grupit parlamentar.
Në postimin e saj, Kabashi-Muçaj ka nënvizuar se nuk do të bëhet pjesë e asnjë koalicioni apo marrëveshjeje të mundshme pa miratimin dhe dakordimin e LDK-së.
“Jam e vendosur që të përfaqësoj me integritet dhe përgjegjësi besimin që më kanë dhënë qytetarët, dhe kurrë nuk do të veproj në kundërshtim me këtë besim”, përfundon ajo në deklaratën e saj.
