Kryeministri në dorëheqje i Kosovës, Albin Kurti, zhvilloi sot një drekë pune me pesë përfaqësues diplomatikë të vendeve partnere, me fokus te zhvillimet politike të brendshme dhe mbështetja ndërkombëtare për Kosovën.
Takimi u mbajt me ftesë të ambasadorit të Finlandës në Kosovë, Matti Nissinen, dhe përfshiu edhe Ambasadorin e Suedisë, Jonas ëesterlund, Ambasadoren e Holandës, Karin Boven, Ambasadorin e Belgjikës, Grégoire Cuvelier, si dhe Shefin e Misionit të Ambasadës së Luksemburgut, Eric Dietz.
Sipas njoftimit të Zyrës së Kryeministrit, gjatë takimit u diskutua për “zhvillimet e fundit në vend, përfshirë procesin e konstituimit të Kuvendit dhe formimin e institucioneve të legjislaturës së nëntë, si dhe tema të tjera me interes në kuadër të komunikimeve dhe shkëmbimeve të rregullta ndërmjet Qeverisë dhe shteteve partnere”.
Kryeministri Kurti u shpreh mirënjohës për mbështetjen e vazhdueshme të këtyre vendeve ndaj Kosovës, veçanërisht në proceset integruese drejt Bashkimit Europian dhe NATO-s, duke e cilësuar bashkëpunimin ndërmjet institucioneve të Kosovës dhe partnerëve ndërkombëtarë si thelbësor për zhvillimin demokratik dhe stabilitetin në vend.
