Deputeti i Lidhjes Demokratike të Kosovës (LDK), Lutfi Haziri, ka kritikuar ashpër rrjedhën e seancave të përsëritura për konstituimin e Kuvendit, duke thënë se qytetarët tashmë po i shohin me neveri dhe zhgënjim këto zhvillime politike, raporton Ekonomia Online.
“Njerëzit po e shohin me neveri rrjedhën e seancës konstituive,” – u shpreh Haziri, duke iu referuar mungesës së zgjidhjes dhe bllokadës së vazhdueshme institucionale.
Ai theksoi se përgjegjësia kryesore bie mbi partinë e parë, e cila sipas Kushtetutës duhet ta menaxhojë procesin përmes një marrëveshjeje politike dhe jo përmes imponimeve.
“Partia e parë duhet ta menaxhojë detyrën përmes një marrëveshjeje politike,” – tha Haziri.
Deputeti i LDK-së nuk la pa komentuar edhe praktikën e ushtrimit të funksioneve të dyfishta nga përfaqësues të partisë në pushtet, duke e cilësuar si abuzim me pushtetin.
“Edhe deputet, edhe ministër – është abuzim i pastër me pushtetin. Ministrat po shihen më shumë në prokurori,” – deklaroi ai me tone kritike.
Sa i përket zhvillimeve ndërkombëtare, Haziri komentoi edhe deklaratën e presidentit amerikan Donald Trump, i cili ka paralajmëruar rikthimin e dialogut Kosovë–Serbi nëse rikthehet në Shtëpinë e Bardhë.
“Përmes një qeverie kalimtare duhet të jemi gati,” – u shpreh Haziri, duke nënkuptuar nevojën për stabilitet institucional përballë sfidave të mundshme ndërkombëtare që e presin Kosovën.
