Shqipëria ka marrë vlerësime pozitive për ecurinë e saj në rrugën drejt anëtarësimit në Bashkimin Evropian, gjatë mbledhjes së 19-të të Komitetit Parlamentar të Stabilizim-Asociimit BE-Shqipëri, që u zhvillua sot në Strasburg.
Në deklaratën përmbyllëse të përbashkët, palët nënvizuan angazhimin e qëndrueshëm të Shqipërisë ndaj integrimit evropian, duke e cilësuar atë një shtysë thelbësore për zhvillimin demokratik, ekonomik dhe institucional të vendit.
Shqipëria u veçua si vendi i parë kandidat që ka nisur negociatat me metodologjinë e re të zgjerimit të BE-së, dhe për këtë arsye u vlerësua për hapat konkretë në zbatimin e reformave kyçe, përfshirë forcimin e shtetit ligjor, luftën kundër korrupsionit dhe përmirësimin e administratës publike.
Mbledhja, e cila shërbeu si platformë për dialog konstruktiv ndërpartiak, u bashkëkryesua nga Marco Tarquinio, përfaqësues i Parlamentit Evropian, dhe Toni Gogu, përfaqësues i Kuvendit të Shqipërisë. Të dy palët theksuan rëndësinë e rolit të Kuvendit shqiptar në përshpejtimin e reformave të nevojshme për integrim.
Në fokus të diskutimeve ishte gjithashtu përputhshmëria e Shqipërisë me politikën e jashtme dhe të sigurisë së BE-së, sidomos në sfidat globale aktuale dhe përpjekjet për ruajtjen e stabilitetit në rajon. Komiteti përshëndeti mbështetjen e Shqipërisë ndaj nismave të rëndësishme si Tregu i Përbashkët Rajonal dhe Procesi i Berlinit, duke e konsideruar atë një partner konstruktiv për paqen dhe bashkëpunimin në Ballkanin Perëndimor.
Përfaqësuesit e Parlamentit Evropian theksuan se progresi i mëtejshëm i Shqipërisë varet nga thellimi i reformave dhe garantimi i funksionimit demokratik, duke ftuar institucionet shqiptare të ruajnë ritmin e transformimeve.
Mbledhja e radhës e Komitetit Parlamentar të Stabilizim-Asociimit BE-Shqipëri pritet të mbahet në Tiranë në gjysmën e dytë të këtij viti, duke përforcuar dialogun institucional dhe monitorimin e progresit në terren.
