Kryeministri në detyrë i Republikës së Kosovës, Albin Kurti, ka njoftuar përmes faqes zyrtare për zhvillimet më të fundit në projektin rrugor Prizren–Tetovë, një ndër projektet më të rëndësishme infrastrukturore që synon të lidhë Kosovën me Maqedoninë e Veriut përmes një traseje të re malore.
Sipas Kurtit, punimet në anën kosovare të malit Korf (i njohur edhe si Vërtop) po vazhdojnë me intensitet, ndërsa në anën tjetër të kufirit, përgatitjet për nisjen e punimeve janë në fazën përfundimtare.
Një takim i fundit i Grupit Punues ndërshtetëror është mbajtur për të shqyrtuar pikat kyçe të detyrës projektuese – dokument kyç për fazën e zbatimit të projektit.
Kryeministri ka pritur në zyrën e tij përfaqësuesit e grupit punues, përfshirë zëvendësministren e Transportit të Maqedonisë së Veriut, Kaltrina Zekolli Shaqiri, dhe zëvendësministrin në detyrë të Mjedisit dhe Infrastrukturës, Hysen Durmishi. Ai ka ritheksuar përkushtimin e Qeverisë për të përmbyllur këtë projekt sa më shpejt dhe me standarde të larta.
Aktualisht, rruga që lidh Prizrenin me Tetovën përmes Prevallës dhe Glloboçicës është rreth 113 kilometra e gjatë. Me ndërtimin e rrugës së re, kjo distancë do të reduktohet në më pak se 50 kilometra, falë një tuneli strategjik prej 6.4 kilometrash që do të shpohet përmes malit të Sharrit.
Kjo pritet të ulë ndjeshëm kohën e udhëtimit dhe të rrisë ndërlidhjen ekonomike, turistike dhe kulturore mes dy qyteteve dhe dy shteteve.
Projekti është ndarë në disa lote, me një investim fillestar prej 35 milionë euro për 22 kilometrat e parë. Ndërkohë, autoritetet e të dy vendeve janë duke përgatitur marrëveshje bashkëfinancimi për ndërtimin e tunelit dhe pjesëve të mbetura të rrugës.
Ky aks pritet të shndërrohet në një arterie të re zhvillimi për rajonin, duke forcuar lidhjet ndërkufitare dhe duke kontribuar në integrimin ekonomik të Kosovës dhe Maqedonisë së Veriut.
